Սույն թվականի հունիսի 10-ին, 13-ին և 20-ին համապատասխանաբար ՀՀ Լոռու, Շիրակի և  Գեղարքունիքի մարզպետարանների և «Հայկական Կարիտաս» բարեսիրական հասարակական կազմակերպության միջեւ ստորագրվեցին փոխըմբռնման հուշագրեր, որոնք վավերացրին Լոռու մարզպետ Անդրեյ Ղուկասյանը, Շիրակի մարզպետ Տիգրան Պետրոսյանը, Գեղարքունիքի մարզպետ Գնել Սանոսյանը եւ « Հայկական Կարիտաս» բարեսիրական հասարակական կազմակերպության գործադիր տնօրեն Գագիկ Տարասյանը: Հուշագրով կողմերը ստանձնում են պարտավորվածություն՝ բազմակողմանիորեն համագործակցել մարզերի համայնքներում կազմակերպության կողմից իրականացվող ծրագրերի իրականացումն առավել արդյունավետ դարձնելու նպատակով: Հանդիպումների ընթացքում ներկայացվեց «ԱՐԱՄԱԶԴ. ՍՄԱՐԹ» ծրագիրը, որը նախատեսվում է իրականացնել Լոռու, Շիրակի և Գեղարքունիքի մարզերի մի շարք խոշորացված  համայնքներում: Ծրագրի նպատակն է խթանել գյուղական համայնքների երիտասարդների համար կայուն զարգացման հնարավորությունները, համայնքի կարևոր դերակատարների միջև գործընկերությունը միջոլորտային համագործակցության և մասնակցության ակտիվացման միջոցով:

Հունիսի 10-ին Լոռու մարզպետ Անդրեյ Ղուկասյանը և «Հայկական Կարիտաս» բարեսիրական հասարակական կազմակերպության գործադիր տնօրեն Գագիկ Տարասյանը «Փոխըմբռնման հուշագիր» ստորագրեցին՝ պարտավորություն ստանձնելով բազմակողմանիորեն համագործակցել մարզի համայնքներում կազմակերպության կողմից իրականացվող ծրագրերի իրականացումն առավել արդյունավետ դարձնելու նպատակով: Միջոցառմանը ներկա էին նաև մարզպետի տեղակալ Գայանե Մարկոսյանը և «Համայնքային զարգացում և աղետների ռիսկերի կառավարում» ծրագրի ռազմավարական ուղղության պատասխանատու Զառա Աղայանը: Մարզպետին ներկայացնելով այցի նպատակը Գ. Տարասյանը նշեց, որ «Հայկական Կարիտասն» արդեն շուրջ 25 տարի գործունեություն է իրականացնում Հայաստանի հիմնականում 4 մարզում, այդ թվում և՝ Լոռու մարզում: Կարևոր ծրագրերից մատնանշվեց Վանաձորում և Տաշիրում «Փոքրիկ իշխան» կենտրոնների գործունեությունը, տարեցների խնամքին,միգրացիային, տուրիզմի զարգացմանն ուղղված աջակցության ծրագրերը և այլն:

ՀՀ կառավարության կողմից համաֆինանսավորվել է «Հայկական Կարիտաս»-ի կողմից սոցիալական պաշտպանության ոլորտում իրականացվող ծրագիրը: Կարևորելով «Հայկական Կարիտաս» բարեգործական հասարակական կազմակերպության կողմից ՀՀ Լոռու մարզում իրականացվող ծրագիրը և «Սաբինե» Փոքր խմբով տան կողմից մատուցվող ծառայությունները, 2019 թվականին ՀՀ պետական բյուջեի «Ընտանիքին, կանանաց և երեխաների աջակցություն» ծախսային ծրագրում ներառվել է «Հայկական Կարիտաս»-ը: «Ընտանեկան փոքր տներում առանց ծնողական խնամքի մնացած երեխաների խնամքի տրամադրման ծառայություններ» միջոցառման շրջանակներում հատկացվել է 7.818.8 հազար դրամ: «Հայկական Կարիտաս»-ի տնօրինությունն իր խորին երախտագիտությունն է հայտնում ՀՀ աշխատանքի և սոցիալական հարցերի նախարարությանը և անձամբ նախարարի առաջին տեղակալ Արսեն Մանուկյանին՝ այսչափ կարևոր ծրագրին աջակցելու համար:  

«Նվազեցնել անկանոն միգրացիան եւ մարդկանց շահագործումը Հայաստանում» ծրագրի շրջանակներում ապրիլի 12-ին Գյումրու թ. 8 միջնակարգ դպրոցում անցկացվեց միգրացիա թեմայով քննարկում-դասընթաց, որին ներկա էին «Հայկական Կարիտաս»-ի մյուս գործընկեր ՀԿ-ները եւս: Քննարկման նպատակն էր աշակերտներին տեղեկացնել միգրացիա երեւույթի, հնարավորությունների եւ մարտահրավերների վերաբերյալ: Սկսվեց բուռն քննարկում դասընթացավարի եւ աշակերտների միջեւ: Աշակերտներից մեկը նշեց. «Միգրացիայի հետեւանքներից մեկը, որն առավել տարածվածներից է, սեռավարակների տարածումն է, մյուսը՝ ուղեղների արտահոսքը»: Աշակերտներից մյուսը նշեց միգրացիայի առավելություններից. «Գնալով մեկ այլ երկիր եւ վերադառնալով` մարդիկ իրենց հետ նոր տեխնոլոգիաներ, հմտություններ եւ գիտելիքներ են բերում»: Խոսվեց նաեւ կանոնավոր եւ անկանոն միգրացիայի մասին: Վերջում աշակերտներն առաջարկեցին իրենց տարբերակները, թե ինչպես կանխել կամ նվազեցնել անկանոն միգրացիան:

Ռաֆայել Սրբազան Մինասյանը եւ Մերձավոր Արեւելքի Կաթողիկե  բարեգործական ասոցիացիայի Ծրագրերի ղեկավար Թոմաս Վարգեսը եւ Հանրային կապերի պատասպանատու Մայքլ Լա Ցիվիտան այցելեցին Արտաշատ` ծանոթանալու այստեղ գործող ծրագրերի հետ: Սկզբում նրանք այցելեցին «Տարեցների տնային խնամք» գրասենյակ եւ հանդիպեցին անձնակազմի հետ եւ քննարկեցին աշխատանքային հարցերը: Ավելի լավ պատկերացում կազմելու համար նրանք նաեւ այցելեցին շահառուներին, ծանոթացան նրանց խնդիրների եւ այն աշխատանքի հետ, որ կատարվում է «Տարեցների տնային խնամք» ծրագրի անձնակազմի կողմից: Այնուհետեւ նրանք այցելեցին «Փոքրիկ Իշխան» սոցիալական կենտրոն: Երեխաները նրանց դիմավորեցին ծափողջույններով եւ ավանդական աղուհացով: Իսկ անձնակազմը հյուրերին ներկայացրեց երեխաների հետ կատարվող աշխատանքը, ինչպես նաեւ ցուցադրվեցին երեխաների ձեռքի աշխատանքները, առօրյա կյանքը, խմբակների աշխատանքը: