Ռաֆայել Սրբազան Մինասյանը եւ Մերձավոր Արեւելքի Կաթողիկե  բարեգործական ասոցիացիայի Ծրագրերի ղեկավար Թոմաս Վարգեսը եւ Հանրային կապերի պատասպանատու Մայքլ Լա Ցիվիտան այցելեցին Արտաշատ` ծանոթանալու այստեղ գործող ծրագրերի հետ: Սկզբում նրանք այցելեցին «Տարեցների տնային խնամք» գրասենյակ եւ հանդիպեցին անձնակազմի հետ եւ քննարկեցին աշխատանքային հարցերը: Ավելի լավ պատկերացում կազմելու համար նրանք նաեւ այցելեցին շահառուներին, ծանոթացան նրանց խնդիրների եւ այն աշխատանքի հետ, որ կատարվում է «Տարեցների տնային խնամք» ծրագրի անձնակազմի կողմից:

Այնուհետեւ նրանք այցելեցին «Փոքրիկ Իշխան» սոցիալական կենտրոն: Երեխաները նրանց դիմավորեցին ծափողջույններով եւ ավանդական աղուհացով: Իսկ անձնակազմը հյուրերին ներկայացրեց երեխաների հետ կատարվող աշխատանքը, ինչպես նաեւ ցուցադրվեցին երեխաների ձեռքի աշխատանքները, առօրյա կյանքը, խմբակների աշխատանքը:

Մայիսի 24-ը նշանակալից օր էր «ՀայկականԿարիտաս»-ի համար, քանի որ «Ավրորա» 2017 մրցանակի հավակնորդ բժիշկ Թոմ Քաթինան եւ նրա գործընկերները պատվեցին գրասենյակն իրենց ներկայությամբ: Բժիշկ Թոմ Քաթինան Սուդանի «Գթության Մայր» հիվանդանոցում աշխատում ու բուժում է շուրջ 750,000 հիվանդների: Հիվանդները հաճախ նույնիսկ մինչեւ մեկ շաբաթ են ծախսում այդտեղ ոտքով հասնելու համար: Բժիշկ Թոմ Քաթինան ծնվել է Նյու Յորքում եւ բժշկի դիպլոմը ստացել է Միացյալ Նահանգների Դյուկ համալսարանում:

1990թ.-ին բժիշկ Քաթինան միացավ Կաթողիկէ բժշկական առաքելության խորհրդին, որը, ի դեպ, եղել է «ՀայկականԿարիտաս»-ի առատաձեռն աջակիցը: Մինչ Սուդան մեկնելը, բժիշկ Թոմը եղել է զինվորական բժիշկ, ինչպես նաեւ աշխատել է Քենիայում, այդ թվում Նայրոբիի ետնախորշերում:

Մարդու տարիքի հետ նրա առողջությունը դառնում է ավելի խոցելի և ավելի մեծ ուշադրություն է պահանջում: Հատուկ խնամակալների (հիվանդապահների) կողմից համապատասխան բուժումները, խնամքը եւ դեղորայքի տրամադրումը դառնում է ուղղակի անհրաժեշտություն, որը Խորհրդային Միության փլուզումից հետո Հայաստանում չի գործում:

2017թ.-ի հունիսը Հայկական Կարիտասի «Տնային խնամք» ծրագրի զարգացման համար կարեւոր շրջափուլ էր: Տեղի ունեցավ 2016թ-ի ամռանը կայացած 3-օրյա անվճար դասընթացների շարունակությունը, որը նախատեսված էր Հայկական Կարիտասի, հայաստանյան խնամքի հաստատությունների եւ ՀԿ-ների բուժքույրերի համար: Այս անգամ եւս, դասընթացները վարում էին բժշկական գիտությունների թեկնածու, ԸԲԱԱ-ի (Ընտանեկան բժիշկների ամերիկյան ակադեմիա) անդամ, Քեմփբելի համալսարանի «բժշկական կրթություն և զարգացում» ֆակուլտետի դեկան Վիկտորիա Կապրիելյանը և նրա թիմը: